BUTUAN CITY – Mag-atubang og patong-patong nga kaso ang duha ka kawatan nga nasikop sa Brgy. Ampayon, ning siyudad sa Butuan.
Sa eksklusibong pakighinabi sa Bombo Radyo Butuan, gibutyag ni Butuan City Police Office kon BCPO spokesperson Police Captain Emmerson Alipit, nga duna nay gipasakang kaso pinaagi sa inquest proceedings batok nila Ricardo Castañeros ug Benjie Gaviola nga nagpailang taga-Lanao.
Base sa pakisusi sa kapulisan, nasuta nga pasado alas-otso hangtod alas-dies sa buntag, unang giransak sa mga suspetsado ang pipila ka balay sa Pareja Subd. sa Brgy. Bayanihan ug uba pang subdivision sa Brgy. Villa Kananga, dayong balhin sa Brgy. Ampayon diin sila nasikop sa kapulisan.
Motibo matod pa sa duruha nga manuktok sa kabalayan ug kung masayran nga walay tao gilayong gub-on ang pultahan gamit ang flat screw.
Mulungtad lang matod pa sa 15 minutos ang paglimas sa mga suspek sa mga gamit sulod sa maong panimalay dayon sibat gamit ang motorsiklo.
Sigon ni Alipit, dako ang posibilidad nga ang mga nadakpan mao ang responsable sa sunod-sunod nga pagransak sa 6 ka balay sa Roosewood Subdivision ning nakalabay’ng tuig busa gi-awhag niini ang ubang nabiktima sa pagpanglungkab nga mudangop sa kapulisan aron mupasaka ug tukmang kaso.
