BUTUAN CITY-Gibutyag ni Senate Committee on Finance chair Sherwin Gatchalian nga kinahanglan ang gobyerno og dugang nga P7-bilyon aron masuportahan ang posibleng repatriation sa mga Overseas Filipino Workers (OFW) kon molala pa ang tensyon sa Middle East.
Sumala ni Gatchalian, mokabat og P13-bilyon ang kinatibuk-ang pondo nga kinahanglanon aron mabalik sa nasud ang mga OFW, apil na ang mga wala’y dokumento. Sa pagkakaron, adunay nakalaan nga P6-bilyon gikan sa 2026 national budget para sa repatriation efforts.
Kahinumduman nga sa pagdungog sa Senado niadtong Biyernes, Marso 6, sigon sa Department of Migrant Workers (DMW) nga kinahanglan nila og igo nga budget aron pondohan ang pagpauli sa mga Pilipino sa Middle East kon molala ang gubat.
Samtang, giingon usab ni Gatchalian nga kinahanglan nga tukion pag-ayo ang panukala nga suspindihon ang excise tax sa lana ug himoon lang kini nga katapusan nga opsyon taliwala sa hulga sa dakong pagsaka sa presyo sa petrolyo tungod sa tensyon sa Middle East.
Matod niya, kon suspindihon ang excise tax, moubos ang koleksyon sa gobyerno nga mahimong makaapekto sa mga serbisyo nga gihatag sa publiko. Dugang pa niya, dili patas ang maong lakang kay mas dako ang konsumo sa lana sa mga adunahan kumpara sa mga kabus.
Dili usab siya pabor sa pagsuspinde sa value-added tax (VAT) sa lana tungod kay mas komplikado ang sistema niini, ilabi na sa bahin sa input ug output tax sa mga supplier.
Sa katapusan, nanawagan ang senador sa Department of Energy (DOE) nga hugot nga bantayan ang mga kompanya sa lana ug ang mga retailer batok sa posibleng pagpahimulos sa presyo sa lana taliwala sa gilauman nga dakong pagsaka niini.
