BUTUAN CITY – Gipangunahan mismo ni Department of Public Works and Highways (DPWH) Secretary Vince Dizon ang personal nga pag-inspeksyon sa gi-ablihang 4-lane detour road sa may Brgy Palacapao, lungsod sa Quezon, Bukidnon.
Sumala sa opisyal, kini usa ka lakang aron masiguro nga husto ang konstruksyon ug safety measures sa detour road, nga gilauman nga makapadali sa dagan trapiko ug makahatag og mas sayon nga dalan alang sa mga motorista ug lokal nga komunidad.
Gidala usab sa maong lugar ang mga engineers ug site personnel sa maong ahensya aron ipakita ang progreso sa proyekto ug masiguro nga nasunod ang saktong standard sa kaluwasan ug kalidad sa dalan.
Gipahimangno ni Sec. Dizon nga ang DPWH padayon sa paghatag og prioridad sa mga proyekto nga makabenepisyo ang katawhan dayong hangyo sa mga residente nga mag-amping samtang nagpadayon ang konstruksiyon sa detour road.
Madumdumang ang lapad nga landslide niadtong Oktubre ning mi-aging tuig 2025 maoy miguba sa portion sa Bukidnon‑Davao kon BUDA highway, rason nga nawad-an og vital link ang Cagayan de Oro, Bukidnon, ug Davao.
