BUTUAN CITY – Pormal nang gipasakan og tasong tax evasion sa Bureau of Internal Revenue (BIR) ang magti-ayong Sarah ug Curlee Discaya, human nadiskubrehan nga wala sila mubayad og buhis nga nagkantidad og kapin ₱7.1 bilyon.
Personal nga gihatod ni BIR Commissioner Romeo Lumagui Jr. ang reklamo ngadto sa Department of Justice (DOJ) uban sa pagpasaka usab og kaso batok sa usa ka corporate officer sa St. Gerard Construction Gen. Contractor and Development Corporation nga konektado sa magti-ayong Discaya.
Base sa makuting imbestigasyon sa BIR, adunay dagkong kakulangon sa buhis ang kompanya ug mga opisyal niini, lakip na ang wala nila pagdeklara sa tinuod nilang kita ug sayop nga pag-file sa tax returns.
Kini nga lakang kabahin sa gipakusgang kampanya sa ahensya batok sa mga dagkong tax evaders sa nasud.
Ilawom sa Run After Tax Evaders (RATE) Program sa BIR, patubagon ang mga indibidwal ug korporasyong milapas sa balaod sa pagbuhis, aron mapalig-on ang koleksyon sa pondo alang sa mga nag-unang serbisyo sa gobyerno.
