BUTUAN CITY – Gisikop na sa mga otoridad ang usa ka tricycle driver sa Brgy. Washington sa dakbayan sa Surigao human matud pa nagdula sa iyang kinatawo atubangan sa pasahero niining babaye niadtong sayo sa buntag sa Agusto 24.
Ang maong pagsikop, subay na sa gihimong imbestigasyon sa Surigao City Traffic Management Office kon SCTMO kalabot sa sumbong nga ilang nadawat, kondiin ang sad-ang drayber, nagmaneho sa tricycle nga dunay plaka numerong SC No. 2173.
Human nadakpan, giendorso gilayon kini ngadto sa Surigao City Police Station (SCPS) aron pasakaan og kasong kriminal ubos sa RA 11313 kon Anti-Bastos Law.
Gi-isyuhan usab kini og traffic citation ticket tungod sa nadiskubrehang mga kalapasan niini sama sa pagmaneho nga wala’y lisensya, pagbinastos, ug ang pagsuot lang og tsinelas ingon man shorts samtang nagmaneho.
Sa pagpanubay, nasayran usab nga aduna na kini gi-atubang nga kasong kriminal niadtong tuig 2023 gumikan sa pagbinastos gihapon sa iyang menor de edad nga pasahero, diin gi-isyuhan gihapon kini kaniadto og traffic citation ticket nga dunay 10,000 pesos nga multa.
Tungod sa seryoso nga mga kalapasan, gi-rekomenda sa Surigao City Traffic Management Office ngadto sa Regional LTO nga ikansela ang Driver’s License niini ug nasayran usab nga daan na diay kining wala gitugotan sa LTO nga makamaneho sukad pa niadtong tuig 2023.
