BUTUAN CITY – Gimalas ang usa ka drug personality human kini nasikop sa gipahigayong operasyon kontra sa illegal nga sugal sa Barangay Bading ning siyudad sa Butuan kaganinang hapon.
Sigon ni PO2 Jun Magulang sa Butuan City Police Station 2, wala nila damha nga masikop ang ilang top priority niadtong anti-illegal drug operation nga si Christian Andagan kansa nagdula ug kulalong sa dihang sila mi- ronda.
Nakuhaan ang suspek ug 2 ka sachet sa gitoohang shabu nga mitimbang ug 5 gramos nga dunay market value nga gibana-banang 59-mil pesos.
Samtang bisan paman ug wala nasikop ang target sa operasyon nga si alyas Tata Legazpi, nakatakda gihapon kining kasuhan ug ang kahimanan sa ilegal nga pasugal, ila usab nga gikumpiska.
Sa pakighinabi usab ning sibyahan kang Barangay Kagawad Patricio Vasquez, gi-angkon niining ilado na sa maong dapit ang target sa operasyonn apan wala kini magtoo nga nagpadayon siya sa iyang illegal nga pasugal.
Samtang sa hisgutanang illegal drugs, gibutyag sa opisyal nga mas gipahugtan nila karun ang Barangay Anti-Drug Abuse Council kon BADAC aron matabangan ang nalambigit sa maong bisyu ilabina ang mga gumagamit nga gikonsidera niining mga biktima.
Gipadak-an matud pa ang budget sa BADAC aron dunay magamit sa ipahigayong mga seminar sa mga musurender nga personalidad dungan nga ila gayud nga gi-agni sa pag-apil.
Samtang ang dili mosanong sa ilang hangyu, gisalig nalang nila sa kapulisan.
