BUTUAN CITY – Gipakita sa mga siyentista sa robotics laboratory sa National University of Defence Technology (NUDT) sa Hunan province, China ang usa ka gamay kaayong drone nga mura og insekto, nga angay gamiton sa surveillance ug reconnaissance nga mga misyon.
Gipakita kini sa publiko sa CCTV 7, ang military channel sa China kansa adunay mga pako ug nipis kaayo nga mga tiil, nga mura gyud og tinuod nga insekto.
Tungod sa kagamay niini, makasulod kini bisan asa ug mahimong dili dali makit-an. Kini posibleng magamit sa daghang industriya ug mga aplikasyon. Bisan pa nga gi-market kini para sa military reconnaissance, daghan ang nagtuo nga gamiton usab kini sa Chinese government para sa surveillance o pagpaniktik. Ang drone nga gipakita sa CCTV7 duna’y 1.3-sentimetros ra ang gitas-on ug dali ra kini makontrol gamit ang smartphone.
Adunay kini mga pako nga mura’g dahon, tulo ka gagmay nga tiil, ug mas hilom kaysa kasagarang drone.
Nagtuo ang mga naghimo niini nga lisod gyud kini makita. Pwede kini gamiton sa daghang paagi — sama sa pagsulod sa lisod maabot nga lugar panahon sa kalamidad, o pag-monitor sa kalidad sa hangin gamit ang mga sensors.
Bisan pa nga nisikat kaayo sa Chinese social media ang mga gamay nga drone nga mura og lamok, aduna gihapon kiniy klaro nga mga limitasyon.
Ang kagamay sa drone usa ka maayong bahin, pero kahuyang usab, tungod kay gamay ra ang battery life ug limitado lang ang pwede nga sensors ug accessories nga madala niini.
