BUTUAN CITY – Luwas nga naka-ambak gikan sa mitiklaob nga dredger sa Butuan Bay partikular sa Brgy. Lumbocan ning siyudad, ang napulo ka mga crews human ang inanay nga pagka-unlod niini nga nagsugod kaganinang alas-nueve sa buntag hangtud nga hingpit kining natunga og mitidlom na pagka-alas onse sa buntag.
Sa eksklusibong pakighinabi sa Bombo Radyo Butuan, gibutyag sa usa sa mga trabahante nga si Jacky Lou Gultiano, residente sa maong barangay, sugdan na unta nila ang pagkabot sa maong parte sa dagat kaganina human nagpadugo kagahapon sa hapon pinaagi sa gi-ihaw nilang baboy.
Apan tungod sa maong hitabo, gitu-uhan niining wala musalir ang dugo sa baboy og hayan mas gustuhon matud pa sa anaa sa dagat ang dugo sa tawo.
Saysay pa ni Gultiano, dihang dili na gyod matabang pa ang pagluwas sa dredger, dinhi na sila nag-iyahay pagpangambak biniyaan ang ilang mga tools nga mao unta’y ilang gamiton sa pagtrabaho.
Sa ilang napulo siya lang ang nasamdan human nga midagan padulong kaniya ang welding machine sa pagtakilid na niini. (Beth Ruiz)
