BUTUAN CITY – Gikumpirma ni Department of Education (DepEd) Secretary Sonny Angara nga personal nga nananghid kaniya si Usec Trgyve Olaivar nga mag-leave of absence una sa iyang trabaho.
Kini human nga gidamay ang pangalan ni Olaivar sa pagdungog kaganina sa Senate Blue Ribbon Committee ni Department of Public Works and Highways (DPWH) Undersecretary Roberto Bernardo nga apil matud pa sa nakadawat og kickback sa mga proyekto sa DepEd sukad niadtong tuig 2010 hangtud ning mi-aging tuig 2024.
Una matud pang nahimamat ni Bernardo si Olaivar niadtong tuig tuig 2010 dihang staff pa kini ni Senador Ramon ‘Bong’ Revilla Jr, hangtud na sa buhatan ni Senador Edgardo ‘Sonny’ Angara ngadto na sa DepEd nga gikuptan gihapon ni Angara.
Niadtong 2024, gipatawag siya ni Olaivar aron hisgutan ang unprogrammed allocations alang sa Office of the Executive Secretary kondiin gi-request ni Olaivar ang listahan sa mga proyekto nga posibleng ma-aprobahan, lakip ang flood control, street lighting, ug road construction nga nagkantidad og ₱2.85 billion.
Dugang ni Bernardo, ang commitment ni Olaivar mao ang 15% nga commission kansa nadumduman pa niyang nagtugon kini kaniya sa mga pulong nga “kinse yan.”
Ang kwarta, gi-deliver matud pa sa Makati ug uban pang lugar, pinaagi kang Engr Henry Alcantara.
Nasayrang natudlo si Olaivar isip DepEd Undersecretary niadtong Agosto 2, 2024 ilawom sa administrasyon ni DepEd Secretary Sonny Angara kondiin kanhi kini staff ni kanhi Senador Ramon ‘Bong’ Revilla Jr ug Edgardo Sonny Angara sa Senado.
Posibleng ipatawag siya sa sunod nga pagdungog sa komite aron makuhaan sa iyang panig.
