BUTUAN CITY – Nadugang isip bag-ong membro sa legal team nga mag-representa kang kanhi Pangulong Rodrigo Duterte sa International Criminal Court kon ICC si French lawyer Dov Jacobs kondiin magsilbi siyang Associate Counsel ug mu-assist kang lead counsel Nicholas Kaufman.
GIpahibalo na sa ICC Registry ang Pre-Trial Chamber kalabot sa appointment ni Jacobs.
Base sa iyang LinkedIn profile ug personal blog, nakalatid nga si Jacobs, defense trial lawyer na sa ICC ug duna’y 15 ka tuig nga kasinatian sa international law, international criminal law ug human rights.
Sa kasamtangan, kabahin siya sa ICC defense teams nila Laurent Gbagbo ug Charles Blé Goudé, nga gikasuhan og upat ka ihap nga crimes against humanity tungod sa post-electoral violence sa Côte d’Ivoire kon Ivory Coast.
Siya usab ang nagkupot sa depensa ni Rwandan leader Felicien Kabuga sa Mechanism for International Criminal Tribunals kondiin gikasuhan siya og genocide, persecution on political grounds, extermination, ug murder isip crimes against humanity.
Si Jacobs, usa ka Assistant Professor sa Public International Law sa Leiden University ug nagtudo sa ubay-ubay nga mga unibersidad.
Nag-trains usab siya og counsel sa ICC isip kabahin sa Training Committee sa ICC Bar Association, diin usa siya ka founding member ug siya usab ang chair sa ICCBA Counsel Support Staff Committee.
Parte usab siya sa Shares Project nga mususi sa alokasyon sa international responsibility sa mga multiple states.
Nakatapos siya sa iyang law degrees gikan sa King’s College London, Paris I Panthéon-Sorbonne ug sa Paris II Panthéon Assas ug sa degree sa Political Science gikan sa Sciences Po, Paris.
Nakakumpleto siya sa iyang PhD sa hybrid tribunals ug international criminal law sa European University Institute sa Florence.
Una nang gibutyag ni Kaufman nga nakompleto na niya ang legal team nga mutabang kaniya pagdepensa kang Duterte sa ICC, diins iya nag-atubang sa mga alegasyong murder isip crime against humanity tungod matud pa sa mga kamatay nga hatud sa iyang war on drugs.
