BUTUAN CITY – Gitangtang na sa Meta ang mga restrictions sa Facebook ug Instagram account ni kanhi United States Pres. Donald Trump samtang nagkaduol ang November 2024 presidential election.
Base sa statement sa maong social media giant, gi-ila nila ang katungod sa mga US citizens nga masayran ug madungog ang plano sa mga nominado pagkapangulo sa maong nasud isip kabahin sa ilang responsibilidad nga tugutan ang political expression.
Sigon pa sa Meta, ang tanang US presidential candidates, magpabiling giyahan sa community standards sama sa paggiya sa tanang mga Facebook ug Instagram users sa tibuok kalibutan.
Unang gisuspinde sa Meta ang mga accounts ni Trump tungod sa iyang pagdayeg sa mga tawong nag-rally, umi-atake ug misulod sa US Capitol niadtong Enero 2, 2021, dungan sa pagbiya na unta niya sa presidential seat.
Niadtong 2023 gibalik ra usab kini sa social media company apan ubos sa hugot nga monitoring, dungan sa pahimangno nga subli kining suspendihon kung subling mulapas sa ilang patakaran.
