BUTUAN CITY- Giklaro sa Department of Labor and Employment (DOLE) nga walay nasudnong pagsaka sa minimum nga suholan nga gikatakda sa Mayo 1.
Sumala ni Labor Secretary Bienvenido Laguesma, nga ang mga pag-adjust sa sweldo magpabilin sa matag rehiyon pinaagi sa Regional Tripartite Wages and Productivity Boards (RTWPBs).
Gipasabot pa ni Laguesma nga ang Kongreso lamang ang makahimo og balaod alang sa across-the-board wage hike. Sa pagkakaron, ang matag rehiyon nagpadayon sa pagbasi sa ilang desisyon sa inflation, presyo sa mga konsumidor, ug kahimtang sa ekonomiya sa dili pa magtakda og pag-usbaw.
Gibutyag usab niini, nga bisan pa sa mga panawagan alang sa P200 nga pag-usbaw sa suholan gikan sa mga grupo sa mga mamumuo, kini moagi gihapon sa regular nga proseso sa pagrepaso sa mga wage board. Sigon pa niini, nga ang tanang rehiyon nagpatuman na og mga pag-adjust sa 2025–2026 wage cycle.
Dugang pa sa DOLE nga ang bag-ong wage cycle alang sa 2026–2027 magsugod sa Mayo, diin ang mga tripartite board magrepaso pag-usab sa posibleng pag-usbaw sa sweldo uban ang representasyon gikan sa gobyerno, mga trabahante, ug mga amo.
