BUTUAN CITY – Apil sa mirampa sa red carpet sa Cannes Film Festival si Pinoy film director Paul Soriano alang sa premiere sa pelikulang Diamond nga gidirehian, gisulat, gi-co-produce, gi-co-compose, ug gibidahan ni Andy Garcia.
Si Soriano — nga nagsul-ob og itom nga Barong Tagalog nga gihimo ni Avel Bacudio — usa sa mga producer sa pelikula nga gipasalida sa Cannes apan wala kini na-apil sa competition category.
Ang pelikula nagasentro kang Garcia isip usa ka pribadong detective nga gihasol sa iyang kagahapon ug naggamit sa iyang talagsaong kaalam ug kusog nga obserbasyon aron matukib ang gitagong kamatuoran ug masulbad ang mga krimen.
Kauban ni Garcia sa pelikula sila Vicky Krieps, Brendan Fraser, Rosemarie DeWitt, Bill Murray, Dustin Hoffman, Danny Huston, ug Robert Patrick.
Human sa premiere sa “Diamond,” gipa-ambit ni Garcia atol sa press conference nga sulod sa daghang tuig iyang gisulayan nga i-pitch ang istorya ngadto sa mga television network, apan walay mipalit sa iyang 60-page pilot treatment.
