BUTUAN CITY – Gibulgar ni kanhi Bulacan district assistant engineer Brice Hernandez pamaagi sa panagbahinbahin sa mga engineer sa Department of Public Works and Highways (DPWH) sa mga kita niini gikan sa ghost projects.
Ang maong rebelasyon gihimo ni Hernandez human gihatagan og legislative immunity bugti sa pagbutyag sa kalakaran sa mga ghost projects sa ilang distrito atul sa nagpadayon nga pagdungog sa Senate Blue Ribbon Committee mahitungod sa mga anumalusong flood control projects kagahapong adlawa.
Sumala ni Hernandez, duna matud pay 40% share ang kanhi boss niini nga si Engr Henry Alcantara gikan sa ilang mga kita, samtang tag-20% usab sila engineer Jaypee Mendoza ug engineer Paul Duya. dugang ni Hernandez nga ang pagsaka sa “grease money” ang hinungdan sa mga ghost projects.
Sa pikas bahin, nahimong emosyonal si Senador Joel Villanueva sa pag-atubang niini kang Hernandez atol sa pagdungog sa Senate Blue Ribbon Committee. Una nang gibutyag ni Hernandez sa House Infrastructure Committee nga usa si Sen. Villanueva sa mga senador nga nakadawat og kickback gikan sa pipila ka mga flood control projects sa Central Luzon.
Isip ebidensya, gipakita pani Hernandez ang mga mensahe matud pa ni Villanueva. Sa panagatubang sa duha kagahapon, gikabutyag ni Villanueva nga dako ang kadaot nga dala ni Hernandez sa pangalan, imahe, pamilya, ug apil na ang simbahan nga gidala niini tungod sa maong mga pasangil.
