BUTUAN CITY – Padayon ang makuting pagsusi sa Department of Health kon DOH-Caraga kalabot sa pagkamatay sa usa ka-grade 3 pupil og pagka-ospital sa laing duha ka grade 5 pupils sa San Isidro Elementary School sa Gigaquit, Surigao del Norte, pila ka oras human naka-inom og pangpurga nga Albendazole.
Sa eksklusibong pakighinabi sa Bombo Radyo Butuan, gipadayag ni DOH-Caraga Regional Director Jose Llacuna Jr. nga nagpadala gilayon siya og usa ka team ngadto sa maong lungsod aron sutaon ang medical record findings sa kamatayon sa bata og sa laing duha nga anaa pa sa ospital.
Ang findings ni Dr. Caga sa Gigaquit District Hospital isubmite pa ngadto kang Dr. Cheryl Gotinga – pediatrician sa Caraga Regional Hospital aron masusi og maayo ilabina nga duna pa’y daghang factors nga ikonsidera.
Gipasabot sa opisyal nga dili pa nila mahatag ang final diagnosis tungod kay ila pang gipadala sa Food and Drugs Administration kon FDA sa Davao City ang Albendazole alang sa tukmang eksaminasyon.
Nagkuha usab sila og blood sample alang sa toxicology testing.
Tungod sa maong panghitabo, temporaryo unang gipahunong sa opisyal ang maong immunization program sa nasangpit nga lungsod aron maprotektahan ang ilang mga personahe nga maoy nang-apod apod sa nasangpit nga mga tambal og aron wagtangon ang mga kabalaka.
Apan giklaro niini nga wala kini magpasabot nga dili luwas ang pag-inom sa maong pangpurga.
