BUTUAN CITY – Gikumpirma ni Dr. Cesar Bringas – regional director sa Department of Education kon DepEd-Caraga nga duna na’y negative impact ngadto sa mga ginikanan ang deworming program karon sa Department of Health kon DOH human nga mi-abot na sa unom ka mga babayeng pupils ang nadala sa ospital human naka-inom og tambal-pangpurga nga Albendazole.
Sa ilang gipagawas nga record kagahapong adlawa, ang unom pulos gikan sa San Isidro Elementary School sa lungsod sa Gigaquit, lalawigan sa Surigao del Norte og bugtong ang grade 3 pupil lang nga si Rheame Ata ang namatay kondiin dead on arrival kini pag-abot sa Surigao del Norte Provincial Hospital.
Dali usab nga natabang human na-admit sa susamang ospital ang tulo kanila samtang outpatient consultation ang laing duha.
Aminado si Dr. Bringas nga dili malikayang mubati og kahadlok ang mga ginikanan pagpa-inom na usab og pangpurga ilabina nga duna’y natalang patay.
Kini bisan pa man nga wala pa’y resulta sa gipahigayong otopsiya sa patay’ng lawas sa biktima og sa nagpadayong imbestigasyon sa Department of Health kon DOH kalabot niini.
Kini usab matud pa ang rason nga dili nila mapugos ang mga ginikanan kung dili nila gustong mu-avail sa deworming program sa kagamhanan pinaagi sa dili pagpirma sa ipadala nilang parent’s consent form.
Subay niini, mi-apela sa mga ginikanan si Dr. Bringgas nga dili una hukman ang nasangpit nga programa ilabina nga wala pa’y gipagawas nga resulta ang DOH-Caraga sa ilang gilusad nga imbestigasyon.
Gawas pa, napulo ka tuig na silang nagpatuman niini nga programa og karon pa lang nahitabo ang ingon niini nga insidente.
Hinuon gipadayag niini nga bisan sa pagpadayon sa DOH sa susamang programa, anaa pa gihapon sa mga ginikanan ang final decision kung tugutan nila ang ilang mga anak pag-avail niini o dili.
