BUTUAN CITY – Naglaum si Department of Energy (DOE) Secretary Sharon Garin nga magamit na sa mas daling panahon ang Malampaya East-1 (MAE-1) aron makatabang sa migrabeng oil crisis sa nasud.
Sa pakighinabi sa Bombo Radyo kang Sec. Garin mahitungod sa posibilidad nga magamit gelayon ang bag-ong naduskibre nga gas reserve kung modugay pa sa pila ka buwan ang giyera sa Middle East, gibutyag sa kalihim nga naglaum siyang mahimo kini sa gobyerno ug sa mga pribadong investor, ilabina kay maayo ang dagan sa halapad nga exploration ug development sa Malampaya Gas Field.
Pasabot pa ni Garin, nagsilbing proteksyon sa oil industry sa Pilipinas ang Malampaya tungod kay duna na kini lokal nga reserba ug dili na kinahanglang moangkat gikan sa mga oil-producing countries.
Bisan paman gitin-aw sa opisyal nga dili pa segurado kung mahimong tukma kini sa energy mix sa bansa tungod kay kinahanglan pang plastaron ang tanang teknikal nga isyu mahitungod niini.
SSa laing bahin, nakig-alayon na usab ang pamahalaan sa mga investor sa nasangpit nga gas field aron tun-an kung mamahimo pang padalion ang proseso aron hingpit nga magamit ang bag-ong nadiskubre nga reserba.
Niadtong Enero 19, 2026, gianunsyo ni Pangulong Ferdinand Marcos Jr. ang pagkadiskubre sa hangtud 98 billion cubic feet nga natural gas sa nasangpit nga lugar.
Sukad niadto, mas gipahugtan pa sa Armed Forces of the Philippines ang pagbantay niini ilabina kay dool kini sa mga teritoryo sa Pilipinas nga gi-angkon sa China.
Ang Malampaya East-1 makaplagan sa lima ka kilometro sa sidlakan sa Malampaya Gas Field.
