BUTUAN CITY – Misaka og 121-porsiento ang kaso sa dengue dinhi sa Caraga Region karong tuiga human kini mi-abot sa 5,949 kumpara sa natala nga 2,690 ka mga kaso ning mi-aging tuig.
Sa eksklusibong pakighinabi sa Bombo Radyo Butuan, gibutyag ni Niel Nituda, entomologist III ug dengue focal person sa Department of Health kon DOH-Caraga, ang pagsaka sa kaso sa maong sakit, wala lang natala dinhi sa rehiyon kondili lakip na sa uban pang mga rehiyon sa tibuok nasud ug gitu-uhang tungod kini sa climate change.
Tungod niini, hugot ang ilang pakig-alayon sa mga local governent units aron ma-aksyunan kini gawas pa sa ginahimo nilang consultative meeting sa ingon mapahibalo ang katawhan sa mga angayang buhaton aron masumpo ang maong sakit.
Aminado ang opisyal nga sa pagkakaron, wala pa’y bakuna kontra dengue rason nga ang pinaka-epektibong buhaton aron dili mataptan niini mao ang paghinlo gayod sa sulod ug palibot sa panimalay.
