BUTUAN CITY- Panahon na matud pa aron pamatud-an sa legal team ni Vice President Sara Duterte nga adunay hulga sa kinabuhi sa Ika-duhang Presidente mao nga nahimo niini ang mga pagpanghulga kang President Ferdinand Marcos Jr. ug sa uban pa.
Sumala sa human rights lawyer nga si Atty. VJ Topacio, permi nga gi-insistar sa kampo ni Duterte nga adunay hulga sa iyang kinabuhi, sama sa ilang gihimong rason sa kontrobersyal nga November 23, 2024 Zoom press conference. Lakip matud pa niini ang kasamtangang Project Romanov kung asa gipagawas sa kampo ni Duterte nga adunay hulga usab sa kinabuhi sa mga kabanay sa Bise Presidente.
Bisan paman nga lahi ang konteksto matud pa sa Project Romanov nga unang gihisgutan ni Mayor Baste Duterte, daw gi-gamit sa kampo ni VP Sara ang maong isyu aron ipasi-ugda nga dako ang hulga sa iyang kinabuhi.
Tungod niini, panahon na matud pa alang sa kampo sa Bise Presidente nga pamatud-an kini sunod simana kung asa gitakda ang kataposang adlaw nga hisgutan ang grave threat article. Kung adunay basehan matud pa, importante usab nga ma-imbestigahan kini sa Philippine authorities pinaagi sa law enforcers.
Sa pikas bahin, nagtuo si Atty. Topacio nga gusto sa prosecution nga palig-unon ang ilang claim nga ang pagpanghulga ni VP Sara usa ka pattern, hinungdan nga i-presnta pa si National Bureau of Investigation Dir. Melvin Matibag sa katposang bahin sa trial days kansa nakagahin alang sa paghisgot sa threat article. Ang maong pattern matud pa dili na pwedeng mawala sa kampo ni VP Sara bisan paman nga ipamugos sa iyang ‘PR team’ nga limpyohon ang iyang image.
