BUTUAN CITY – Girekomenda karon sa Police Regional Office kon PRO-13 ngadto sa Philippine Drug Enforcement Agency kon PDEA nga i-upgrade na ang ilang Dangerous Drugs Board kon DDB value sa cocaine.
Kini human migawas sa ilang makuting pagsusi nga mas mahal pa ang matag-gramo sa shabu nga gibansagan og ‘poor man’s cocaine’ kumpara sa mga narekober nga floating high-grade cocaine.
Sigon ni P/Supt. Christian Rafols – tigpamaba sa PRO-13 sa eksklusibong pakighinabi sa Bombo Radyo Butuan, wala pa sukad na-upgrade ang balor sa cocaine tungod sa kawala’y market niini dinhi sa Pilipinas rason nga posibleng dili para dinhi sa atong nasud ang napalgang pila ka mga cocaine.
Iyang gidugang nga sa pagkakaron, mu-abot sa 11,800-pesos ang matag-gramo sa shabu samtang 5,300-pesos lang ang sa cocaine nga niadto pang 1980s nga kantidad.
Dugang pa sa opisyal, kinahanglan nang i-upgrade ang maong DDB value sa cocaine base sa international price niini aron masayran ang tinuod nga kantidad sa mga narekober nga floating cocaine dili lang dinhi sa Daraga Region kundili sa tibuok nasud. (Beth Ruiz)
