BUTUAN CITY – Naka-abot na sa Hollywood Hills ang wildfires sa California nga unang mikaylap sa ubos nga bahin dapit sa dagat.
Sa eksklusibong pakighinabi sa Bombo Radyo Butuan, gibutyag ni Bombo international correspondent Marlon Buque direkta gikan sa California nga nakapasamot sa pagkaylap sa wildfires ang kusog nga hanging mu-abot sa 160-kilometros matag-oras. Gibutyag niining wala naka-andam ang tanan sa maong panghitabo tungod kay bugnaw man karong panahuna sa nasangpit nga lugar bisan og medyo mabati ang ka-init sa adlaw kung adlawan.
Ang kakalit sa maong panghitabo maoy rason nga daghan ang wala’y naluwas nga mga gamit sulod sa ilang panimalay apil na ang mga sakyanan nga gipangbiyaan na lang kilid sa dalan kansa nahimo pang babag sa mga bombero pagpalong sa kalayo.
Katag-katag matud pa ang pag-ulbo sa kalayo sa managlahing siyudad sa southern California rason nga bisan silang anaa lang sa northern part, ma-abtan gihapon sa aso nga gikan sa wildfires.
Sa iyang latest monitoring, nadugangan pa ang ihap sa mga tawong gipahikling ug mi-abot na matud pa sa 60-bilyunes dolyares ang kantidad sa mga na-abo nga propiedad nga gila-umang madugangan pa. Pinaka-apektado ang mga tourists spots sa maong lugar ilabina kadtong kanunay nga himuong set sa mga pelikula.
