BUTUAN CITY – Gikabalaka sa gobyerno sa Republic of Congo ang pag-igo sa COVID-19 sa ilang nasud.
Sumala ni Bombo international correspondent Gerry Ruiz – lumad nga taga-Brgy. Talisay, Nasipit, Agusan del Norte ug chef sa usa ka restaurant sa capital Kinshasha, duna’y ubang lugar na nga mitala og kaso sa maong virus rason sa gipatuman nga lockdown nga misangpot sa pagsira na sa ubang mga establishemento ug negosyo gawas sa mga kan-anan, parmasya ug bangko.
Sa eksklusibong pakighinabi sa Bombo Radyo Butuan, gipadayag niining gilabihan ang kabalaka karun sa gobyerno sa maong nasud tungod kay wala’y kapabilidad ang ilang mga ospital nga mutambal sa mga COVID-19 patients ug wala usab sila’y saktong pasilidad.
Nagpadugang sa ilang kabalaka nga musaka pa ang ihap sa nataptan sa virus ang kulang sa kahibalo sa proper hygiene sa kadaghanang mga tawo tungod na usab sa kulang nila nga edukasyun og tungod sa kapobrihon.
Gawas pa kini sa dili pagsunod sa mga locals sa mando sa gobyerno sama nalang sa pagsoot og face masks.
Gipa-ambit usab ni Ruiz ang daghang bugoy sa maong nasud diin kaylap ang pagpanulis ug pagpanglungkab rasong doble amping silang tanan.
