Nagpadala og contingent ang Bureau of Fire Protection kon BFP Caraga ngadto sa Northern Cebu human mi-igo ang magnitude 6.9 nga linog sa rehiyon.
Sumala ni Fire Senior Superintendent Peter Sean Anthony Atup, ang 12-ka man team, naggikan sa lain-laing fire stations sa Caraga Region ug adunay espesyal nga kahibalo sa search, rescue, ug retrieval operations. Gani pipila kanila bag-o lang nakahuman sa ilang training sa Taiwan, samtang ang uban nakapakita na sa ilang kapasidad atol sa usa ka nationwide simultaneous earthquake drill sa Taguig City.
Dugang pa sa opisyal, gawas sa mga personnel, nag-deploy usab sila og collapse structure ug search and rescue fire truck aron mas mapalig-on ang operasyon.
Sigon pa ni Atup, ang operational period sa maong deployment nagsugod kagahapon Oktubre 2 ngadto na sa Oktubre 7 aron mu-augment sa existing responders nga gikan sa Region 7, samtang ang National Headquarters nagpadala usab og dugang nga pwersa gikan sa Region 6, 8, 9, 10, Bangsamoro Region, Negros Island Region, ug mga kasikbit nga rehiyon kansa nagtinabangay sa pagpangita ug pagluwas sa mga biktima sa kalamidad.
