BUTUAN CITY – Gikasuhan na usab sa mga International Criminal Court kon ICC prosecutors si kanhi Pangulong Rodrigo Duterte og tulo ka ihap sa crimes against humanity, tungod sa iya matud pang kalambigitan sa dili mu-ubos 76 ka mga kaso sa pagpatay isip kabahin sa war on drugs campaign.
Ang charge sheet nga dunay petsang July 4 apan gipagawas lang sa publiko kagahapong adlawa, naglatid sa mga akusasyon sa 80-anyos nga kanhi lider kinsa natanggong karon sa ICC detention facility sa The Hague.
Ang unang ihap dunay kalabutan sa iya matud pang kalambigitan isip co-perpetrator sa 19 ka mga pagpatay nga natigayon tali niadtong tuig 2013 ug 2016 dihang mayor pa siya sa Davao City. Ang ikaduhang ihap duna’y kalabutan sa 14 ka pagpatay sa gibansagang mga “High Value Targets” niadtong 2016 ug 2017 dihang presidente na si Duterte. Ang ikatulo duna’y kalabutan sa 43 ka mga pagpatay nga nakumitar atol sa clearance operations sa lower-level sa mga gi-alegahang drug users o kaha pushers nga natigayon tali niadtong 2016 ug 2018.
Madumdumang ang arrest warrant nga gi-isyu kang Duterte niadtong Marso 7 ning tuiga, duna lamay usa ka ihap sa crimes against humanity nga gikutay ngadto sa 43 ka gika-ingong pagpatay. Ang dugang kasong gisang-at sa prosecutors, natigayon sa bisperas sa gikatakdang pagpatim-aw sa kanhi pangulo sa ICC aron dunggon ang mga akusasyon batuk kaniya apan gisibog tungod kay gisuta pa sa korte kung ha-um ang akusado pag-atubang sa maong pagdungog.
