BUTUAN CITY – Gi-andam na sa Office of the Ombudsman ang paghimo og lawom nga pagtuki sa giturn-over nga computer ug mga dokumento sa mitaliwan na nga si Department of Public Works and Highways Usec. Catalina Cabral.
Sumala ni Assistant Ombudsman Atty. Mico Clavano, ipa-ilawom sa digital forensic examination ang Central Processing Unit o CPU nga gigamit sa kanhi opisyal human na-turn over ning mi-aging semana sa Department of Public Works and Highways ngadto sa Office of the Ombudsman.
Kini subay sa pag-isyu sa opisina og ‘subpoena duces tecum’ kansa nagmando sa departamento pag-produce sa nahisgutang mga butang. Gipaniguro sa Office of the Ombudsman nga transparent o bukas ang himuong eksaminasyon uban ang Commission on Audit kon COA, Department of Public Works and Highways, ug Philippine National Police Anti-Cybercrime Group aron masiguro ang integridad sa proseso.
Dugang pa ni Clavano, selyado na ang giturn-over nga CPU sa opisina sa tanod-bayan.
Gikunsoidera usab kini sa Ombudsman isip critical development ilabina sa imbestigasyon sanglit mapresenta mismo ang original nga ebidensya.
Nagtuo usab ang Ombudsman nga ang labing kasaligan nga tinubdan sa ebidensya mao kadtong gikan sa mga ahensya sa gobyerno ug mga indibidwal nga nagkupot niini. Mas maayu matud pa ‘direct source’ kumpara sa mga kopya lamang.
