BUTUAN CITY – Puno sa pagtulun-an, amazing ug maka-proud ang paglawig sa 50 ka mga indibidwal nga misalmot sa ikatulong adlaw na sa Lulinghayaw Diyan Sawgan-Agusan River Cruise dinhi sa dakbayan sa Butuan kaganinang buntag.
Kini ang reaksyon sa usa sa mga partisipante nga si Ben April Mangitngit, lumad nga taga-Bayugan City, lalawigan sa Agusan del Sur ug didto na nagtrabaho sa Davao City human sa kinatibuk-an nilang pagsuroy-suroy sa mga riverbank barangays.
Sigon ni Mangitngit, nakakuha siya og lawom nga kasayuran sa kasaysayan ug kultura ning siyudad sa Butuan niadtong pre-colonial period tungod sa pagbalik-lantaw nga gihimo sa mga organizers sa mga barangay nga ilang gihunungan.
Apil niini ang karaang pagpangisda sa Brgy Pagatpatan gamit ang sapyaw, ang kasaysayan sa pinaka-karaang simbahang Katoliko sa Mindanao human nakita ang Banza church ruins ingon man ang building site sa mga balangay boats sa Brgy. Bading.
Kini gawas pa sa pipila ka mga pinulungang Butuanon nga iyang nakama-uhan ingon man ang mga delicacies ning siyudad nga palagsing ug Davao-Davao.
