BUTUAN CITY – Nagdeklara og ceasefire ang gobyerno tali sa Communist Party of the Philippines-New People’s Army kon CPP-NPA.
Subay kini sa rekomendasyon sa gobyerno ug sa National Democratic Front of the Philippines (NDFP) peace panels karong holiday season.
Nagsugod ang ceasrfire kaganinang alas-12 sa sayong buntag, Disyembre 23 hangtod alas-11:59 sa gabii sa Enero 7, 2020.
Alayon niini, gibutyag ni presidential spokesperson Salvador Panelo, nga gimandoan na ang Department of National Defense ug Department of the Interior and Local Government ingon man ang Armed Forces of the Philippines (AFP) ug Philippine National Police (PNP) nga magpagawas og official declaration ug makipag-alayon sa CPP-NPA-NDF subay sa nasangpit nga ceasefire.
Gimando usab ni Pangulong Rodrigo Duterte nga subling magmugna og Government of Republic of the Philippines (GRP) negotiating panel, nga apilan ni Executive Secretary Salvador Medialdea isip miyembro.
Dugang pa ni Panelo nga panahon sa ceasefire gidid-an ang mga rebeldeng NPA paglusad og operasyon samtang bawal usab ang police ug military operations.
Gisiguro usab sa NPA nga anaa sila sa defensive mode ug hugot nga magbantay sa bisan unsang lakang nga himuon sa mga personahe sa GRP.
