BUTUAN CITY- Gibutang na karun sa heightened red alert status ang rehiyon sa Caraga kini human nga ilubong ugmang adlawa ang kinadak-ang kumander sa CPP nga si Ka Oris.
Sumala ni PolMaj. Dorothy Tumulak ang regional spokesperson sa Police Regional Office 13 (PRO 13) sa eksklusibong pakighinabi sa Bombo Radyo Butuan nga sukad pa kaniadto, gisaka na sa red alert level ang rehiyon bisan pa sa hulga sa posibleng pagbalos sa hugpong sa rebeldeng grupo kon New People’s Army (NPA )ilabina nga gipakusog ang pagbatok sa insurhensiya ning rehiyon dungan na sa kamatayon sa ilang taas nga kumander nga si Jeorge Madlos alyas “Ka Oris” kansang ilubong na ugmang adlawa, alas 10 sa buntag sa usa ka pribadong sementeryo sa Surigao City.
Dugang pa ni Tumulak nga gibantayan pag-ayo na karun sa kapulisan ug kasundalohan ning rehiyon ang mga hilit nga lugar nga dunay hulga sa rebeldeng grupo pinaagi sa monitoring system nga ilang gihimo.
Giklaro usab niini nga usa kini ka dakong kawad-on ngadto sa nahabiling walhong grupo ang nahitabong kamatayon ni Ka Oris.
Nanawagan usab kini nga mahimong mobalik na ang mga niini sa sabakan sa gobyerno tungod kay wala’y makuhang kadaugan ang gihimong pakigbisog sa mga niini kontra sa gobyerno kondili ang tinoud nga kadaugan ang paghimo sa pagtugyan sa ilang kaugalingon balik sa ngadto sa gobyerno
