BUTUAN CITY – Gikumpirma ni Romelyn Torralba – information officer sa Department of Health kon DOH- Caraga nga duna na’y usa ka kaso sa stray bullet injury nga natala ang ilang buhatan sugod kagahapon.
Sa eksklusibong pakighinabi sa Bombo Radyo Butuan, gipadayag sa opisyal nga base sa ilang Regional Surveillance Unit, ang wala pa panganling biktima nga nagpuyo sa lungsod sa Alegria sa lalawigan sa Surigao del Norte, mitambong sa Christmas party dihang kalit na lang kining na-igo sa saag nga bala.
Dali kining gidala sa district hospital sa kasikbit nga lungsod sa Kitcharao lalawigan ng Agusan del Norte og gi-refer na sa Caraga Regional Hospital City sa Surigao City kinsa anaa na karon sa stable nga kahimtang.
Dugang pa sa opisyal, sayo pa aron i-assess ang mga firecracker-related o kaha stray-bullet-related injuries karong yuletide season tungod kay kanunay matud pang duna’y matala ang ingon niining mga kaso kung magkaduol na ang pagsugat sa bag-ong tuig.
Aron malikayan ang kadaut nga hatud sa pagpabuto, nanawagan ang opisyal ngadto sa tanan nga likayan na ang paggamit og pabuto. (Beth Ruiz)
