BUTUAN CITY – Luwas pa gihapon gikan sa African Swine Fever kon ASF ang Caraga Region taliwa nga kontaminado na niini ang kasikbit nga rehiyon sa Davao.
Tungod niini, gi-awhag ni Emmylou Presilda – information officer sa Department of Agriculture-Caraga nga wala’y angayang kabalak-an ang katawhan ning rehiyon ilabina sa mga paliton nilang karneng baboy basta siguraduhon lang nga duna kini certificate gikan sa National Meat Inspection Services kon NMIS-Caraga.
Sa eksklusibong pakighinabi sa Bombo Radyo Butuan, gipadayag sa opisyal nga padayon ang hugot nga monitoring sa mga checkpoint aron masigurong dili makasulod ang mga imported meat products nga posibleng ipalusot ning rehiyon.
Subsob usab ang pagpanguha sa ilang mga technical experts og mga samples aron matag-karon ug unya, ma-update sila kalabot sa maong isyu. Mihangyo usab siya sa katawhan nga mu-abag sa kampanya kontra ASF ug ubanan sa pag-ampo aron magpabiling ASF-free ang rehiyon.
