BUTUAN CITY – Duna’y igong supply sa bugas ang tibuok Caraga Region.
Kini ang giklaro ni Edna de Guzman – regional director sa National Food Authority kon NFA-Caraga sa eksklusibong pakighinabi ning sibyahan.
Gipasabot sa director sa eksklusibong pakighinabi sa Bombo Radyo Butuan nga duna’y duha ka mga aspeto ang rice supplies sa nasud nga gilangkuban sa macro og micro supplies.
Ang macro supplies mao kadtong commercial rice, household og NFA rice samtang ang micro, mao kadtong anaa sa ilang ahensya nga mao lang ang NFA rice.
Gidugang ni de Guzman nga migawas sa ilang pagduki-duki og sa survey nga gihimo nga niining bulan lang sa Agusto, ang tibuok Caraga Region duna’y kinatibuk-ang macro supply nga 1.2-milyunes ka mga sako sa commercial, household og NFA rice.
Kini nga supply mulungtad matud pa og kapin sa duha ka buwan kon hangtud sa unang semana sa buwan sa Oktubre, basta ang tanang mga Caraganons mukaon og NFA rice.
Kini nga pagbana-bana, base matud pa sa kada-adlaw nga basic consumption requirements sa tibuok rehiyon nga mu-abot sa dul-an 20-mil ka mga sako.
Gidugang pa sa director nga wala’y problema sa rice supply ang Caraga base sa ilang monitoring ilabina sa commercial rice.
Kini tungod kay ilang nasuta nga ang supply ning rehiyon padayon ang inflow gikan sa kasikbit nga mga rehiyon sama sa Davao, Cotabato og uban usab nga mga lalawigan.
Gawas pa, padayon usab ang ilang monitoring sa presyo niini aron masayran kung duna ba’y pagtaas kansa tima-ilhan nga duna’y problema sa supply. (Beth Ruiz)
