BUTUAN CITY – Gikumpirma ni Dr. Jose Llacuna Jr., regional director sa Center for Health and Development kon CHD-Caraga nga trese na ang natalang ‘Patients Under Investigation’ kon PUIs dinhi sa Caraga Region as og 5:30 ning hapuna samtang 3,873 usab ang mga ‘Persons Under Monitoring’ kon PUMs, base na usab sa report nga gipa-abot sa ilang Epidemiology Unit.
Sa eksklusibong pakighinabi sa Bombo Radyo Butuan, gipadayag ni Dr. Llacuna nga sa maong ihap, 3,596 pa ang padayong mipa-ilalom sa quarantine samtang 277 ang nakatapos na sa ilang isolation period.
Sa trese ka mga PUIs usab, tulo ang naka-confine sa Adela Sierra Ty Medical Center sa Tandag City lalawigan sa Surigao del Sur samtang unom sa Caraga Regional sa Surigao City sa Surigao del Norte ug tulo ang gipa-ilawom sa istriktong home quarantine ug nagpa-abot pa sa mamahimong resulta sa ilang swab test.
Sigon ni Dr. Llacuna wala’y gitaho kanilang migrabe ang ilang mga simtomas dungan sa panawagan sa tanang gustong dili mugrabe ang sitwasyon nga maminaw sa ilang advisory pinaagi sa dili paggawas sa balay tungod kay kini matud pa ang pinaka-epektibong paagi aron dili na mukaylap pa ang virus.
