BUTUAN CITY – Daghan pa ang mga posibleng mahitabo sa kandidatura niadtong mga naka-file na sa ilang certificate of candidacy kon COC alang sa May 9, 2022 local ug national elections, ilabina sa mga national candidates.
Kini ang giklaro ni Commission on Elections kon COMELEC-Region 10 director Atty. Francisco Pobe human gipadayag ni Senador Ronald ‘Bato’ de la Rosa nga mapasubo siya pagpadayon sa iyang pagpapili pagka-presidente kung hugot nga barugan ni Davao City Mayor Indy Sara Duterte-Carpio nga dili mudagan sa maong posisyon. ‘
Sa eksklusibong pakighinabi sa Bombo Radyo Butuan, gipadayag sa opisyal nga duna’y tulo ka hugna ang candidacy withdrawal and substitution nga gitugot sa Commission on Elections kon COMELEC kansa ibase sa mga petsa diin kini kinahanglang himuon.
Una niini mao kadtong gihimong filing sa COC gikan niadtong Oktubre 1 hangtud 8 kansa gitawag nilang abre-gana tungod kay niining panahuna human og file sa COC, mahimo nang mu-withdraw sa kandidatura o kaha mupuli sa usa ka kandidato.
Ikaduha mao ang withdrawal and substitution period human sa COC filing hangtud na sa Nobyembre 15 apan kinahanglang ang muhulip nga kandidato, gikan sa usa lang ka partido.
Tungod niini, kadtong kandidatong independente, dili na pulihan apan kadtong duna’y partido, mahimong hulipan sa iyang ka-ubanan ra usab sa partido.
Samtang ang ikatulo ug katapusang hugna, mao ang gitugot nila nga substitution nga mahitabo gikan sa Nobyembre 16 hangtud sa alas-dose sa undto lang sa mismong adlaw sa eleksyon sa Mayo 9, 2022.
Apan kini ubos lang sa kondisyon nga gi-disqualify sa korte ang kandidato o kaha namatay ang kandidato apan kinahanglan nga ang ipuli, susama og apilyedo sa namatay’ng kandidato.
Samtang sa mga partylists, giklaro ni Atty. Pobe nga lahi usab ang mahitabo tungod kay ang withdrawal and substitution duna’y period nga gihatag kondiin ang kandidato mao ang partido ug dili ang ilang mga nominees.
Ang matag-party list, gitugutan matud pa nga makabaton og tulo ka mga nominees matag-eleksyon apan pwede silang makaduso og lima tungod kay kung duna’y mu-withdraw, dili na kini ilisan pa.
