BUTUAN CITY – Pormal nang gi-refer sa House of Representatives ngadto sa Committee on Justice ang upat ka verified impeachment complaints batok kang Bise Presidente Sara Dutert human kini masulod sa Order of Business sa sesyon nga gipangunahan ni Deputy Speaker Ferjenel Biron.
Tungod niini, nagsugod na usab ang one-year bar rule o ang pagdili sa pagsang-at og susamang reklamo sulod sa usa ka tuig.
Ang unang tulo ka reklamo gisang-at sa mga miyembro sa Makabayan bloc, party-list representatives, ug lain-laing grupo sa civil society, lakip na sa mga lider-simbahan ug abogado samtang ang ika-upat, gisang-at usab ni Atty. Nathaniel Cabrera ug gi-endorso sa pipila ka magbabalaod.
Nakatutok kini sa alegasyon nga wala matud pa hingpit nga gideklara ni VP Sara ang pipila ka kabtangan sa iyang Statements of Assets, Liabilities and Net Worth (SALN) ug posible nga adunay dili maipatin-aw nga bahandi.
Ubos sa 1987 Constitution, mahimong ma-impeach ang presidente o bise presidente tungod sa culpable violation of the Constitution, treason, bribery, graft and corruption, uban pang grabe nga krimen, o betrayal of public trust.
Sunod nga hukman sa Justice Committee kung igo ba ang mga alegasyon aron mapadayon ang impeachment complaints.
