BUTUAN CITY – Hugot karun ang pagmonitor sa sektro sa transportasyon sa mamahimong kausaban sa presyo sa produktong lana sunod semana tungod na usab sa mga hongihong nga dakong usbaw niini dungan sa pagpadayag sa dakong kasubo.
Sigon ni Wilfredo Ybanez, Chairman sa Butuan City Wide Tricycle Transportation Cooperative nga sunod semana nila himoon ang ilang mga lakang ugaling hingpit gyud nga mapatuman ang taas nga usbaw og makita ang reyalidad sa kataas sa presyo sa gasolina.
Lakip sa ilang himoon matud pa mao ang paghangyu ngadto sa lokal nga kagamhanan ning siyudad nga ma-ayudahan sila.
Kini dayung butyag nga dili na sila magdahum pa sa ayuda gikan sa nasyunal tungod kay sauna ra kini nga mga pamahayag apan pipila lang ang nakadawat sa ilahang grupo gawas nga gamay ra kaayu ang ayuda.
Sumala pa ni Ybanez nga ang ilang sektro gayud ang direktang ma-igo sa kasamtangan nga sitwasyon rason usab nga mi-abiso na kini sa mga kaubanang drayber nga minusan ang pagbiyahe diha sa kadalanan.
Sa hisgutanan usab sa usbaw sa plitihan, gibutyag sa chairman nga dili na sila magduso ani sa pagkakarun tungod kay duna nay pending nga sugyot nila sa nakalabay nga tuig diin wala pa na-atiman tungod kay gihulat pa ang dugang mga dokumento sa bag-ong ordinansa usab nga gipatuman ning siyudad.
Nakalatid sa maong sugyot nga usbawan gikan sa 10 pesos ang plitihan ngadto sa 12 pesos sa unang 4 ka kilometro.
Apan kung makita gayud matud pa nga hilabihan kataas na ang presyo sa gasolina sunod semana nga laumang masundan sa musunod pa nga mga semana, mohangyu matud pa siya sa iyang mga kaubanan nga usabon ang giduso nilang sugyot mahitungod sa usbaw sa plitehan.
