BUTUAN CITY – Subling nanganaw-kanaw ang Butuan City Division human nakuha ang overall champion sa gipahigayong Caraga Regional Athletic Meet kon CRAM.
Nasayrang kini na ang ika-pitong sunod-sunod nga overall champion nga nakuha sa maong division diin karung tuiga gihimu ang CRAM sa Tandag City, Surigao Del Sur.
Kaganina, gipahigayon ang closing ceremony diin nanguna ang Butuan City Division nga dunay 103 ka bulawang medalya, 61 ang silver ug 43 ang bronze.
Gisundan kini sa delegasyon gikan sa Agusan Del Norte nga dunay 40 ka Gold, 37 ang silver ug 63 ang bronze ug ikatulo ang Surigao City nga dunay 39 Gold, 29 Silver ug 25 Bronze samtang ika-upat ang Surigao Del Sur nga dunay 36 Gold, 47 Silver ug 60 Bronze nga gisundan sa Tandag City ug Bislig City.
Gibutyag pa ni Elizalde Bernales, Regional Information Officer sa Department of Education kon DepEd-Caraga nga na-apektuhan gayud sa kusog nga pag-ulan ang kalihukan tungod kay nalunupan ang venue apan malampuson gihapon kining natapos.
Ang mga mananaog nga atleta makadawat ug medalya, trophies ug certificate ug inisyatiba na sa lokal nga kagamhanan kung muhatag sila ug cash.
