BUTUAN CITY – Gikumpirma ni Land Transportation, Franchising and Regulatory Board kon LTFRB-Caraga OIC regional director Ma. Kristina Cassion nga tungod sa pagpa-ilalom na sa Inter-Agency Task Force for the Management of Emerging Infectious Diseases kon IATF-EID sa tibuok Caraga Region general community quarantine, duna na usa’y biyahe sa pampublikong mga sakyanan gikan karong Mayo 16 – adlaw’ng Sabado.
Apan kini limitado lang tungod kay gamitan gihapon kini og special permit samtang padayon usab ang pag-obserba sa social distancing.
Sa eksklusibong pakighinabi sa Bombo Radyo Butuan, gibutyag sa opisyal nga duna na unya’y inter-provincial routes gikan sa Butuan City padulong na ngadto sa kaluhang lalawigan sa Agusan del Norte ug Sur ug wala pa’y labot usab sa kaluhang lalawigan sa Surigao del Norte ug Sur isip respeto sa hangyo sa ilang provincial government nga nga dili una pasudlan ang ilang mga lalawigan og taga-laing lalawigan.
Samtang sa intra-city routes, padayon pa nila kining gitun-an aron makasubay sa pagpa-ilalom sa city government sa lima ka mga barangay diha sa gihapon sa ECQ samtang sa modified ECQ usab sa laing 18.
Gibutyag sa opisyal nga kung hisgutan ang hierarchy sa mga de-pasaheruang sakyanan dinhi sa Butuan, prayuridad nila ang mga modern transportation sama sa mga bus units sa DATSCO ug UV van apan tungod kay mihangyo ang mga operators sa mga multicabs, kini karon ang ilang sentro sa pagtuon ilabina nga kinahanglang lantawon usab ang kalisod sa ekonomiyang naka-apekto sa mga operators.
Ang ila lang gi-require nga ang ilang buhatan gihapon ang magtakda sa mga ruta kondiin ang biyahiang mga barangay mao lang kadtong anaa sa national highway nga sulod sa general community quarantine kon GCQ tungod kay sila man ang mamahimo unyang stopping points ilabina nga ipatuman gihapon sa mga quarantine passes. Kini gawas pa nga duna na’y ka-usaban sa eskedyol sa biyahe nga nag-unang mu-cater niadto ang mga trabahante.
