BUTUAN CITY – Nagpahimangno si Senador Christopher ‘Bong’ Go ngadto sa Independent Commission for Infrastructure, apil na sa Ombudsman ug sa Department of Public Works and Highways nga mahimong mas gubot ang nasud kung dili nila tarungon ang ilang imbestigasyon ug dili matumbok ang kamatu-uran kalabot sa mga angayang patubagon sa anumalusong mga flood control projects.
Gipadayag kini sa senador human nga mipasaka og kasong plunder batuk kaniya uban kang kanhi pangulong Rodrigo Duterte si kanhi Senador Antonio Trillanes IV kagahapon ngadto sa Ombudsman.
Sa iyang gipatawag nga press conference kagahapon, gipadayag sa senador nga klarong diversionary tactic ang gihimo ni Trillanes tungod kay halata matud pa kaayong duna’y nagmani-obra karon og script o playbook aron mawala o malingla ang katawhan ug mawala na sa huna-huna ang garapalang kurapsyon.
Balik-balik niyang gipanawagan sa maong mga ahensya nga tumbukon ang kamatu-uran nga maoy gihulatan sa kinabag-ang katawhang Filipino ug dili ang script nga maoy gihatag karon sa mga tawong nagpapansin.
Kini pinaagi sa pagpapriso sa mga nalambigit sa kurapsyon apil na ang mastermind niini.
Awhag pa niini sa mga investigating bodies, dili mutipas sa kamatu-uran ug sa mga nagpasi-ugda aron mawala ang tinuod nga mga isyung gi-imbestigahan, ang kaylap nga kurapsyon sa gobyerno. Panawagan usab niini kang Trillanes nga kung matinud-anon kini sa iyang gipasi-atab nga kawsa, nganong wala niini kasuhi ang mga tawong tinuod nga nalambigit karon sa kurapsyon nga maoy nag-finance kaniya.
