BUTUAN CITY – Padayon pang gipangita sa kapulisan ug sa mga opisyales sa Brgy. Pinamanculan ning siyudad sa Butuan ang 28-anyos nga si Joshua Cadiz aron patubagon sa iyang gihimong pagluba-patay sa iyang asawa nga si Carmila Enero tungod lang sa kanunay nga pagselos.
Sa eksklusibong pakighinabi sa Bombo Radyo Butuan, gibutyag ni Brgy. Kagawad Alheinxer Hermoso, nga daan nang duna’y record sa ilang barangay ang misibat nga suspetsado tungod sa kanunay matud pa niining pagbahad sa biktima nga pamatyon sila rason nga nag-isyu pa ang barangay og protection order aron dili na makapaduol sa mag-inahan ang responsable.
Gani nagkasabot pa ang duha nga magbuwag na apan natingala na lang sila nga nag-uli na sila hangtud nga nahitabo ang pagpangluban nga nasaksihan matud pa sa tulo nila ka mga anak. Ngilngig nga kamatayon ang na-angkon sa biktima tungod kay dihang nalubaan kini sa dughan, migawas sa autopsy report nga gituyok-tuyok pa sa suspetsado ang kutsilyo diha sa dughan sa iyang asawa.
Dugang pa ni Kagawad Hermoso, ilado sa ilang barangay ang suspetsado nga kawatan, ug kanunay nga gilambigit sa mga ilegal nga kalihukan sama sa pasugal ilabina sa paggamit ug pagpayuhot og ginadiling druga.
