BUTUAN CITY – Nagpadayon ang manhunt operation sa tracking team sa Special Investigation Task Group (SITG) Segovia aron madakpan ang drayber sa motorsiklo nga gigamit nga getaway vehicle sa pagpusil-patay sa radio announcer nga si Erwin ‘Boy Pana’ Segovia sa Bislig City, Surigao del Sur niadtong miaging buwan.
Kini human nasikop ang gika-ingong gunman sa maong krimen nga si alyas Jeffrey Birador, 40-anyos, usa ka mag-uuma ug residente sa Sitio Napanpanan, Barangay Rajah Cabungsuan, lungsod sa Lingig, Surigao del Sur.
Nadakpan siya dihang gisilbihan siya sa duha ka search warrant nga gi-isyu sa presiding judge sa Branch 46, 11th Judicial Region sa Bislig City, Surigao del Sur, tungod sa kalapasan sa Comprehensive Firearms and Ammunition Regulation Act ug Illegal Possession of Firearms, Ammunition, or Explosives.
Ang operasyon nga gihimo pasado alas-7:52 ning mi-aging gabii nga misangpot sa pagkakumpiska sa usa ka sling bag, duha ka kalibre .45 nga pistola nga adunay tagsa ka magazine nga may unom ka buhing bala matag-usa, usa ka brown nga holster, ug usa ka fragmentation grenade.
Tungod niini, gidayeg ni PCol Jeffrey Lawrence Mauricio, ang Provincial Director sa Surigao del Sur Police Provincial Office, ang malampusong pagka-aresto sa suspetsado nga mugna matud pa sa pag-abag sa katawhan.
