BUTUAN CITY – Mitambong ang Pinoy pop girl group nga BINI sa usa ka send-off ug thanksgiving mass isip pagpangandam sa ilang umalabot nga pasundayag sa Coachella Valley Music and Arts Festival.
Gipahigayon ang misa ning mi-aging adlaw sa Chapel of the Annunciation of Our Lord, diin nakita ang walo (8) ka miyembro nga sila Jhoanna, Aiah, Colet, Maloi, Gwen, Stacey, Mikha, ug Sheena.
Sumala sa grupo, importante alang kanila ang pag-ampo sa dili pa ang matag-dakong buluhaton.
Gipadayag ni Jhoanna nga na-andan na nila ang pagpahigayon og misa matag event isip pasalamat ug pagpangayo og giya.
Samtang, mi-angkon si Mikha nga wala pa gyud kaayo nila ma-realize ang makasaysayang higayon nga makapasundayag sa Coachella, apan andam sila mohatag sa ilang siento-porsientong performance.
Una nang nagpahigayon ang BINI og send-off event sa Market! Market! sa Taguig nga gitambongan sa mga 15,800 ka fans o “Blooms,” diin ilang gipahibalo usab ang ilang bag-ong EP nga “Signals” nga ipagawas sa Abril 9.
Gikatakdang mopasundayag ang BINI sa Coachella sa Abril 10 ug 17, ug sila ang unang Filipino homegrown group nga motungtong sa maong international music festival.
