BUTUAN CITY – Napabilib sa Pinay girl group BINI ang mga Japanese audience human sa ilang makasaysayanong debut sa Summer Sonic 2026 sa Osaka, Japan kagahapon, Agosto 14.
Misaka sa Mountain Stage ang walo ka miyembro sa grupo nga sila Aiah, Mikha, Sheena, Maloi, Stacey, Jhoanna, Colet ug Gwen—nga mikuha og atensyon tungod sa ilang sidlak nga mga outfits.
Gisugdan sa BINI ang ilang performance pinaagi sa mga kantang “Cherry on Top,” gisundan sa “Zero Pressure,” “Out of My Head,” “Blush,” “Step Back” ug “Sugar Rush.”
Gipakita usab nila ang “Born to Win” ug ang Filipino-Japanese version sa “Salamin, Salamin,” sa wala pa nila gitapos ang performance pinaagi sa ilang hit song nga “Pantropiko.”
Gipaambit usab sa grupo sa ilang Facebook page ang video sa ilang performance sa “Born to Win,” samtang nangatagak usab sa social media ang mga video sa ilang performance nga gi-share sa ilang mga fans o Blooms.
Mobalik ang BINI sa pag-perform sa Tokyo leg sa Summer Sonic ugmang adlawa, Agosto 16.
Samtang, apil usab sa lineup ang P-pop boy group nga SB19, nga naka-schedule nga mag-perform sa maong festival sa karong adlawa ug ugma.
