BUTUAN CITY – Malampuson ang pagpatuman sa Bureau of Fire Protection kon BFP-Caraga sa ilang kampanya batuk sa mga pabuto tungod sa kawala’y natalang nasunog nga mugna sa mga firecrackers sa pagsa-ulog sa Pasko ug pagsugat sa bag-ong tuig 2026.
Kini human nila gire-activate sa unang adlaw pa lang sa Disyembre ning mi-aging tuig ang ‘Oplan Paalala:Iwas Paputok’ campaign nga mas gipalig-on pa, sa ila usab nga gilusad nga kampanya niadtong Disyembre 28 nga ‘Oplan Paalala: sa Paputok Umiwas, sa Torotot Mas Ligtas’ kondiin nanghatag sila og mga torotot sa kabataan.
Sa eksklusibong pakighinabi sa Bombo Radyo Butuan, gipadayag ni regional spokesperson FSInp Cypol Jay Inocente, base kini sa iyang nakuhang impormasyon sa Operations Division sa ilang regional headquarters hangtud ning mi-aging gabii. Mapamatud-an matud pa kini base sa mga datus nga ilang nadawat gikan sa ilang mga provincial offices ning rehiyon.
Tungod sa mga natalang sunog atol sa holiday season nga mugna sa faulty electrical wiring, tambag ni Inocente sa tanan nga kung ang linya sa kuryente sa ilang balay mu-abot na sa 15 ngadto sa 20 ka mga tuig, kinahanglang ilisan na kini.
Kini ilabina nga dili nila kini ma-inspeksyon kada-tuig, sukwahi sa mga business establishment nga kada-tuig nila inspeksyunan, matag-renew sa ilang permit.
