BUTUAN CITY – Padayon karun ang imbestigasyon sa kapulisan sa nahitabong pagransak sa mga armadong kalalakin-an sa panimalay sa may Barangay Ambago ning siyudad sa Butuan kaganinang ala1:25 sa buntag.
Base sa pagkumpirma ni Police Staff Sergeant Bernard Amora gikan sa Butuan City Police Station-3, pugsanong gisulog sa dili moubos sa 15 ka mga tawo nga pulos armado sa tag-as nga kalibre sa armas ang panimalay ni Romulo Pala, 55-anyos, menyu ug negosyante.
Hinoon wala na pasipad-e pa ang mga indibidwal nga anaa sulod sa balay apan gitangag niini ang cash nga gibana-banang mukantidad sa 150-mil pesos, mga alahas nga mibalor sa 60-mil pesos, nagkadaiyang klase sa mga cellphone nga mikantidad og 115-mil pesos ug 2 ka yawe sa sakyanan.
Sumala pa ni Amora, naka-bonnet ang mga suspetsado diin dunay nakatatak pang CIDG ang ilang mga gisoot og nagpailang CIDG-Davao.
Gihulat na usab sa kapulisan ang kumpletong report gikan sa Scene of the Crime Operatives kon SOCO samtang padayon nga nakig-alayon sa buhatan sa CIDG ilabina didto sa Davao Area kung wala ba silay operasyon dinhe sa siyudad sa Butuan.
