BUTUAN CITY – Napagawas na og statement si Dapa, Surigao del Norte Mayor-elect Elizabeth Matugas human naglusad og rali ang mga supporters sa naparot nga si outgoing Mayor Peter Boy Ruaya.
Sigon ni Matugas, katungod sa panig sa napilding mayor ang pag-question, dungan sa pagklaro nga bakak ang ilang pasangil nga ang limbong matud pa sa piliay ang rason sa maong kapildihan.
Nasayrang midaog si Matugas sa margin nga 1,229 ka mga boto human mihakot og 9,069 batuk kang Ruaya nga mihakot lang og 7,840 ka mga boto.
Gibutyag niini nga kung ipamugos sa mga supporters ni Mayor Ruaya nga duna’y limbong, buot matud pa ipasabot nga ang Surigao City, tibuok lalawigan sa Surigao del Norte og ang tibuok nasud, ilang kwestyunon partikular ang COMELEC ilabina ang mga vote counting machines nga maoy responsable sa pag-ihap sa mga boto og dili siya.
Tinguha sa bag-ong mayor ang pagpalambo sa Dapa kansa ulahi na matud pa kaayo kumpara sa ubang mga lungsod kondii partikular niyang tutukan ang imprastraktura og turismo tungod kay sentro matud pa ang Dapa sa komersyo og pamatigayon.
Iyang gidugang nga ang boulevard nga maayong lugar unta alang sa tourist attraction gigamit nang parking area sa mga trak.
Imbitaron matud pa niya ang mga kayaking og jetski-riding investors pagmontar og resort sa ingon duna’y kongkretong rason sa pagsa-ulog unya nila sa Araw ng Dapa matag-Agusto 12.
Mahinumdumang niadtong tuig 2016, nagduso siya og protesta human napildi og gatusan ka mga boto batuk sa incumbent mayor apan gi-deny sa huwis ang iyang petition, rason nga iyang gi-elevate ang kaso ngadto sa higher court.
Iya lang gihunong ang petisyon dihang gitudlo siya ni Pangulong Duterte nga membro sa Sangguniang Panlalawigan.
Nanumpa siya isip 1st District Board Member niadtong Disyembre 4, 2017 hulip kang Board Member Leonila Gorgolon kinsa nahimong RTC Branch 30 Judge niadtong Mayo 18, 2017.
