BUTUAN CITY – Ning-abot na sa Pilipinas ang bag-ong guided missile corvette-class warship gikan sa South Korea nga dunay advanced weapons ingon man radar systems.
Usa ang 3,200-ka toneladang warship nga tawgong BRP Miguel Malvar, sa duha ka mga corvette-class warships nga parte sa kasabutan sa Pilipinas ug South Korea niadtong tuig 2021.
Gikan ang maong pangalan sa unang corvette sa rebolusyonaryong heneral sa Pilipinas ug bayani nga si Miguel Malvar.
Madumdumang una nang gilusad ang sister ship niining BRP Diego Silang sa Ulsan, South Korea ning nakalabayng bulan, apan gikatakda pa lamang nga ipadala sa Pilipinas.
Gipangunahan ang maong seremonyas ni Defense Secretary Gilberto Teodoro sa Naval Operating Base sa Subic, Zambales diin gidawat sa Philippine Navy ang bag-ong warship.
Sumala sa kalihim, ang pag-abot sa BRP Miguel Malvar sa nasod, dili lamang mahimong deterrent ug tigpanalipod sa katubigan sa Pilipinas, kundi importanteng bahin sa joint ug combined operations uban ang mga kaalyadong nasod.
Ang mga corvettes mao ang mga gagmay apan paspas ngamga warships nga gilaumang magamit sa pagprotekta sa ubang mga barko gikan sa posibleng mga pag-atake.
