BUTUAN CITY – Nasakmit sa usa ka babaye gikan sa Arkansas ang Guinness World Record alang sa titulong “pinakadaghan nga T-shirts nga gisul-ob samtang nagdagan og half marathon sa babaye.”
Malampusong nahuman ni Meredith Smith ang Fort Smith Half Marathon sulod sa dili molapas og tulo ka oras ug tunga samtang nagsul-ob og 55 ka T-shirts. Nakuha niya ang titulo gikan sa kaparehong Amerikana nga si Jennifer Romano.
Sumala ni Smith, kini talagsaong hagit dili lang para makab-ot ang Guinness record, kondili usa usab ka selebrasyon sa iyang malampusong pagkunhod sa timbang.
Nagsugod siya og dagan niadtong 2013 aron magpapayat, ug sukad niadto nakunhod siya og 80 pounds (36 kg).
Aron mangandam sa lumba, nag-ensayo siya nga nagsul-ob og hangtod 80 ka T-shirts aron ibalik ang gibug-aton nga iyang nawala—murag pagbalik sa iyang daang lawas ug timbang sa wala pa siya mipayat.
Para kaniya, ang pisikal nga kabug-aton sa nagpatong-patong nga sinina nahimong pahinumdom kung unsa na kalayo ang iyang naabtan.
Gipaambit usab ni Smith nga sa iyang pagkabata, dili gyud siya ganahan modagan.
Apan nausab kini tungod sa mainitong suporta nga iyang nadawat gikan sa running community.
Human siya makatabok sa finish line, malipayon niyang gisaulog ang iyang kalampusan uban sa iyang pamilya ug dayon gihubo ang daghang sinina nga nagsimbolo sa mga kabug-aton nga iyang nabuntog alang sa iyang kahimsog.
