BUTUAN CITY – Dili babag alang sa usa ka avid listener sa Bombo Radyo Butuan ang kalayo sa ilang lugar, makadalikyjat lang dinhi sa Butuan aron nga maka-apil sa grand draw sa Buena Mano Salvo Year 14 promo sa Bombo Radyo Philippines.
Sigon ni Valeriano ‘Val’ Mitaran, 62-anyos, taga-Brgy. San Isidro, lungsod sa Tomas Oppus, Southern Leyte, pito ka oras ang iyang gibiyahe sakay sa van padulong sa lungsod sa Liloan og sakay na usab og barge patabok sa Surigao City dayon sakay na usab og bus padulong na ning siyudad sa Butuan.
Bitbit sa iyang pagbiyahe ang kapin sa 2-mil ka taklop ba San Miguel Beer, 200 ka putos sa Milo, mga resibo sa Petron nga gipabayluan og coupon aron gamiton isip proof of purchase apil na ang mga gamitong sobre.
Tumang kalipay ang iyang gibati human niya personal nga nahimamat ang mga personahe sa Bombo Radyo Butuan nga pila ka tuig na niyang gisundan og gipaminawan sa ere.
Uban sa iyang pagbiyahe ang pag-ampo sa Kahitas-an nga makuha niya ang iyang target nga madag-an ang grand prize nga usa ka milyon ka pesos.
Nasayrang dili lang kini ang unang higayon nga duna’y entrante sa promo ning sibyahan nga taga-Visayas area nga naghulog sa ilang mga entries tungod kay duna usa’y taga-Leyte nga nagpadala sa iyang mga entries pinaagi sa courier uban sa gipataban niining sulat nga naghangyong padag-on siya.
