BUTUAN CITY – Gikalipay ni Major Joe Patrick Martinez, tigpamaba sa 4Th Infantry Division, Philippine Army nga makitang malinawon ang pamuyo karun sa mga bag-ong henerasyon sa rehiyon sa Caraga tungod sa wala nay hulga sa rebelding New People’s Army.
Sigon sa opisyal nga layu ra kaayu ang kahimtang kaniadto ug sa karun human mihinay na pag-ayu ang puwersa sa walhong grupo. Tungod niini, gipadayag usab sa opisyal nga inanay nang mabalhin ngadto sa law enforcement Operation ang pagsanta sa walhong grupo o trabaho nalang kini sa kapulisan.
Kini tungod kay manageable naman ang hulga nga hatud sa nasangpit nga armadong grupo.
Samtang ang Armed Forces of the Philippines inanay na usab nga mabalhin ngadto sa external security o ang pagdepensa sa teritoryo sa Pilipinas.
Gitumbok pa sa opisyal ang dakong hagit nga nag-atang kanila mao ang West Philippine Sea nga boot ilogon sa China.
Tungod niini, nanawagan gihapon ang opisyal og pagtinabangay sa tanang katawhan sa pagdepensa sa teritoryo. Kini pinaagi sa pagpakusog sa reserve force og pag-apil sa ROTC nga magamit usab sa panahon sa kalamidad.
Si Major Joe Patrick Martinez, tigpamaba sa 4Th Infantry Division, Philippine Army.
