BUTUAN CITY – Mas prayoridad karun sa Ladlad-Caraga ang pagduso ug anti-discrimination bill ug dili ang balaod may kalabutan sa same sex marriage.
Kini ang reaksiyun ni Isang Bacasmas, Chairman sa Ladlad-Caraga sa baruganan ni Pangulong Rodrigo Duterte nga wala gitugutan ang gay marriage base na usab sa family code of conduct.
Sigon ni Isang, girespetu niya ang pamahayag sa pangulo dungan sa pag-angkon nga bisan ug ilang pangusgan ang same sex marriage, lisud kining makapasar dinhe sa nasud.
Apan giklaro ni Bacasmas nga dili kini ang prayoridad sa Ladlad-Caraga, kundi ang anti-discrimination bill nga maoy hilabihang gikinahanglan sa LGBT Community sa kasamtangang panahon.
Kini matud pa ang magprotekta kanila sa diskriminasyon sa kumunidad.
Gitumbok niini ang paghikaw sa miyembro sa LGBT-community sa unsa nga uniform ang sooton sa ilang pagtungha.
Gipadayag pa niini nga sila tao usab nga nagkinahanglan ug respetu ug gustong makatagamtam sa kalipay nga natilawan sa ubang tawo. Gawas pa kini sa ilang pagka-bumabayad ug tax.
Hinoon dako ang pagtoo ni Isang nga makalusot ang anti-discrimination bill sa kongreso ug senado tungod kay pabor man niini si Pangulong Rodrigo Duterte nga mitugot nga ipapasar ang maong sugyot sa Davao City niadtong mayor pa kini sa maong siyudad.
